Gracias totales

Gracias totales é un ritual de agradecemento arredor dunha mesa. É unha posta en situación que reúne textos, discursos, xestos e movementos arredor do simple feito de dar as grazas. Unha peza relacional onde o ritual comparte espazo coa comida, a conversa, a maxia, a investigación dun xesto ou dunha palabra.

Un grupo de persoas xúntase arredor dunha mesa para lembrar e invocar artistas, poetas, cantantes ou actrices que souberon agradecer de forma fermosa. Indagan en linguas descoñecidas –do quechua ao islandés pasando polo xaponés– a contaxiosa sonoridade da gratitude, a súa textura, o seu sabor, o arrecendo que desprende, o seu poder sutilmente transformador, e mentres o fan hai algo neles que se predispón mellor, algo así como unha sanación.

Ao mesmo tempo, mentres se escoitan agradecer e se agradecen, os performers van construíndo no centro da mesa un pequeno altar que alimentan con fotos familiares, libros, colares, plantas, cunchas, pedras, talismáns, etc.; toda unha serie de obxectos que conforman a ofrenda viva do agradecemento, o seu rexistro máis fiel e palpable, ofrecendo ao outro facer o propio. Porque, ao fin e ao cabo, nunca agradecemos o suficiente, e agradecer non ten data de caducidade.

/ Este Cruceiro Paraíso é posible grazas ao apoio da Deputación da Coruña