Eyilá ashé ebbora - archivo vivo de la resistencia é un proxecto de creación escénica que explora a espiritualidade como potencia política para a transformación social. Inspírase nos saberes subalternos das persoas Afro, trans, racializadas e migrantes do sur global e os feminismos negros que se están producindo en España.
Eyilá ashé ebbora - archivo vivo de la resistencia é a segunda investigación da serie escénica Opira, iniciada en Cuba en 2019 e que propón explorar o cruzamento entre o corpo filosófico yoruba, as ritualidades Afrocaribeñas e as performatividades contemporáneas. Un exercicio de combinación do espiritual e o matérico a partir da escoita profunda e crítica dos camiños e designios que propoñen cada uns dos doce signos do diloggún (sistema ancestral yoruba de adiviñación na Regra Osha Ifa, practicada en Nixeria, Benín, Cuba, Brasil e outros países do caribe e AbyaYala) para mirar as problemáticas das nosas sociedades contemporáneas.
José Ramón Hernández (Palma Soriano, Cuba, 1988). Artista interdisciplinar afrocubano graduado do Instituto Superior de Arte de Cuba. Fundador e director artístico de Osikán - viveiro de creación. A súa práctica desprázase entre a dirección artística, a dramaturxia, a coreografía, o comisariado de artes en vivo, a instalación, a performance, a educación, a mediación e a xestión cultural.