Coa vontade de practicar o contármonos, en RPM queremos abrir un espazo de pensamento colectivo a través dunha serie de sesións de análise crítica sobre proxectos artísticos. Sentimos que existen poucos lugares –dende e para a comunidade artística– nos que xuntarnos para abordar como contamos o que somos, o que facemos e como somos percibidas.
Estas sesións buscan xerar ferramentas para pensar como se constrúe o relato dun proxecto: que mostra, que oculta, como se comunica e que percepcións produce. Interésanos atender ás dimensións individual e colectiva dos procesos críticos, abrindo preguntas arredor da coherencia, a linguaxe, a singularidade, a percepción e as tácticas e estratexias nas que un proxecto se fai lexible, abrindo ao mesmo tempo a posibilidade de imaxinar outros relatos, desbordamentos e matices posibles.
Cada sesión partirá da presentación dun dossier artístico propio como caso de estudo e desenvolverase a través de distintas dinámicas de análise individual e colectiva, e espazos de posta en común.
Estas sesións están dirixidas á comunidade artística na súa amplitude disciplinar, tanto para artistas noveis como artistas de mediana carreira.
Sesión 1 – xoves 4 de xuño de 19 a 21 horas
Sesión 2 – xoves 9 de xullo de 19 a 21 horas
Ademais do traballo curatorial e de xestión das distintas liñas de acción de RPM, desde o equipo RPM deseñamos, coordinamos e acompañamos distintas experiencias artísticas ao longo do ano, tanto en ESPAZO RPM como convidadas por outras iniciativas.