A illas de San Simón e a de San Antón son un excepcional enclave situado na enseada da ría de Vigo, cunha forte carga simbólica colectiva vencellada cos seus diversos papeis ao longo da historia: testemuña de traxedias e avatares mariños, idílica referencia literaria da poesía medieval, refuxio monacal, lazareto para enfermos infecciosos, cárcere do réxime ditatorial franquista para illamento político...
A illa de San Simón é hoxe un espazo público para o desenvolvemento cultural de Galicia, nun enclave recuperado de gran valor patrimonial e ambiental. No 1999 foi declarada Ben de Interese Cultural pola Xunta de Galicia e a illa e a súa enseada forman parte da Rede Natura 2000 como hábitat natural europeo protexido.
Ao longo do ano, as súas instalacións acollen o desenvolvemento dunha extensa programación, como lugar de colaboración con diversas entidades e organismos para actividades formativas e de investigación.
Dende 2021 o noso Encontro Paraíso sucede na Illa de San Simón.